Komisiyo ya Sena ishinzwe Politiki n'Imiyoborere yasuye Ibitaro by'Akarere bya Remera-Rukoma.

Itsinda rya Komisiyo ya Sena ishinzwe Politiki n’Imiyoborere, riyobowe na Senateri Gasana Alfred, ryasuye Ibitaro by’Akarere bya Remera-Rukoma mu rwego rwo gusuzuma ibikorwa bigamije gukomeza no kunoza serivisi z'ubufasha zitangirwa mu Kigo Isange One Stop Center gikorera muri ibi bitaro.

Iri tsinda ryagejejweho imikorere n'ibikorwa bya Isange One Stop Center ndetse rinagirana ibiganiro n'abakozi bamwe b'ibitaro, hamwe n'abahagarariye Akarere, Urwego rw'Ubugenzacyaha ku rwego rw'Akarere (DCI), n'abahagarariye izindi nzego bireba. Intego y'uru ruzinduko yari ukumenya imikorere rusange ya Isange One Stop Center, uko ikorana n'abafatanyabikorwa batandukanye, ibibazo ihura na byo, ndetse no kwakira ibitekerezo n'inama byafasha kurushaho kunoza serivisi itanga.

Muri ibi biganiro, hagaragajwe ko umubare w'abahabwa ubufasha muri Isange One Stop Center ugenda wiyongera. Hanagarutswe ku bibazo birimo abana bahisha ihohoterwa bakorewe n'ababyeyi babo, ndetse n'abana bajyanwa kwa muganga batarandikishwa mu bitabo by'irangamimerere, bikaba bishobora guteza imbogamizi mu itangwa rya serivisi no gukurikiranwa kw'ibibazo byabo.